सिकार – चंदरअ महन माहतअ (Sikar – kudmali bhasa )

 1. सिकार – चंदरअ महन माहतअ

कुड़मालि केहनि जुड़ति  (kudmali kehani judati)

‘सिकार’, ‘कुड़मालि केहनि जुड़ति ‘ कुड़मालि केहनिक पथि कर पेहिला केहनि हेकेइक । एकर केहनिकार चंदरअ महन माहतअ हेकेइक । केहनिक एहे पथि टा कर निखराइआ माने परकासक ‘मुलकि कुड़मालि भाखि बाइसि’ रांचिक दिगेले हेल आहेइक ।

‘सिकार’ साड़ा कर माने लेइ एकर भितर किना बिसइ आहेइक ? टुएक आहला देल आहेइक । इठिन एक बाघ कर सिकार करेक एहे केहनि कर गड़ा बिसइ हेकेइक ।

पाठ :- ‘धिरेन’, ‘बिरन’ आर एक झनेक आसल पाठ आहेइक । जानुआरेक नेते ‘एक बाघ’ आहेइक । जेंइ धिरेन कर साधेक गाइ मारि खाइ गेल आहेइक । एकर बदला दिएक खातिर सेइ बाघ कर सिकार करे हेइक । केहनि कर सुर सांझ माने राइत बेरा ले सुरु हेउए हेइक आर राइत भरेइ बाघ कर सिकार करल परे फुराइ जा हेइक । सारांस :- केहनि माहान धिरेन जाकर गाइ बाघे मारि खाइ गेल रहलेइक । उं सेइ राइते घुमाइ हेल मेनतुक आंइखे घुम नाइ । अंइ निजेक गाइ कर लेइ भाभना फिकिर करे लागल, जे गाइ ना रहले किना हेतेइक । सेइ राइतेक बेरांइ हुल हुल सितलि हाउआ बहे हेलेइक । कारतिक मासे रिचिक आधेक जाड़ा सामाइ जाइक, तेंइ अंइ ‘आंउरि’ कर भरसि धराइ अलढाल रहल । काल मेघ राइत हेकल । एक टिअ मेघे तारा निहिं देखा हेलेइक | बादइर – बादइर बुझाहेलेइक, राइत टुएक ढेरेइ हेल रहल, काहुं साड़ा सबदअ निहिं सुना हेलेइक । मेनतुक अकर आंइखे टुएकअ घुम नाइ, अकर आंख ठाड़ हेइ रहलेइक आर अकर आंइखे सेइ बाघ टाके देखे खजे हेलाइ । काहेकि अकर एक दिन आगुए साधेक गाइके खाइ देल आहेइक । एकादसि कर राइत हेकलेइक । चाइअ दिगे फिनफिनिआ इंजत हेलेइक मेनतुक बादइर कर लिला खेला एसन जे कखनअ चांद आगु दिगे बाढ़ अहेइक तअ कखनअ फेइर चांद के ढापि देहेइक काल बादइरे । एहे चांद आर बादइर कर लिला खेला देखिके धिरेन कर हिआ कचटाइ जा हेइक ।

अंइ संचइस आइज ले चाइर दिन परेइ हामराक पुरखाक बांदना परब हेकेइक । सेइ बेरांइ गाइएक केते मान आर महत त उटा किना बाघे जानइक ? एहे परबेक बेरांड घार आंगना कर लरा लिपा, पति दिन तुलसि पिढ़ाई मड़अलि, गबर छिरुआइन दिएक खातिर गबर काहां पाउआतेइक ? गाइ बरदेक परबे गाइएक दुधेक पिठा, फेइर पुजांइ दुध ढारेक खातिर दुध काहां पाउआतेइक ? एसन तअ आड़ पड़सि ठिन मांगिके दुध ढारेक बा पिठा करेक खातिर पाउआतेइक, मेनतुक एखराक परबे गाइ चुमा नेग टा केसे करि साइत हेतेइक ? काहे कि धिरेन कर घारे आरअ दसर गाइ निहिं आहेइक

एसन इसथिति माहान किना बुढ़ा पुरखा ले चालाइल आनल नेग नेति गिला छाड़ातेइक । पुजा पासा, चुमा चुमि नि हेतेइक ? एहे नाना रकमेक भाभि गुनि अकर छाति गुमरि उठलेइक आर मने मने किरा खाल – “पुजा पासा नि हेतेइक ? जबे तके पार ना करब, इ पार नि तअ उपार ।”

एहे परन करि राइत जेसइ टुएक झलफल हेलेइक । धिरेन फारसा धरल आर अंइ दुख आर राग माहान सेंप ढके लागलाइ। अकर आंइखे केंचि आर लर, चुइल मुड़ धुंधुल फुंधुल, आंइख गेरुआ निअर लाले लाल, हांथे फारसा धरिके आंगनाक तुलसि पिढ़ांइ आइके डाढ़ाल आर आरदास करे

लागल। सेइ बेरांइ बिरेन कनह कामे बाहराल तअ एसन देखल | घार दिगे बिड़ि टाने सामाल फेइर बाहिर बाहराइ देखल तअ आंगनाइ आर धिरेन के निहिं देखे पाउअल । तखन बिरेने धिरेनेक घारेक आरअ दसर लकके पुछलेइक तखन अकर बहुंइ कहलेइक – केइ जान अखरा हामराके कनहइ निहिं कहला ।

एसन सुनि बिरेन अकबकाइ गेल। तखन अंइ झट पट बाहिर बाटे गेल तअ देखइस जे धिरेन हाउ डुंगरि दि सटसटाइके जाइस । पेहिला सांझ कर कथा हेकलेइक तें … बिरेन कर मने संका हेलेइक जे कि धिरेन अबइसअ बाघ टा करेइ सिकार करे जाइस। इ खेपाइ गेल आहाइ। एकाइ किना बाघेक सिकार हेतेइक ? बिरेने तखन संचइस जे एबार जदि मइ अके घुराए जाइए आर जदि उ नि घुरतेइक हेले ? तेंइ बिरेनअ घार घुरि आइके एक फारसा धरि इड़कअलेइ गेल अकरेइ पेछुइ ।

एहे बेरांइ एक तिसर झने धिरेन पेछुइ बिरेन कुहुं दउड़ि जाइत के अकर मने संका हेलेइक, जे अखराक बिचे कनह टाक लेइ झगड़ा हेल हेतेइक ? एसन हेले तअ मारा काटा हेतेइक । एहे संचिके अहउ अखराक दिगे बाढ़े लागल | मेनतुक दुइअ जखन एक संग जाइके जाइते देखल तअ अकर • मनेक संउच टा ले उलटा हेलेइक । तखन सेइ तिसरा झनुहुं बुझल जे धिरेने बदला दिएक खातिर सेइ बाघ टाक सिका जाइ साहाइ । तेंइ हामरानि अके घुराइएक बेजांइ कसनि करलिए, मेनतुक अंइ हड़ धरि देलेइक आर एकेइ काथा कहे लागल – “मइ आरअ नि घुरम, इ पाइर नि तअ उपार!”

एहे कथा सुनि अंइअ पसताइ लागल जे काहे एहे अलहुआक पेछुइ आउलिए। अकर मने एखनअ घुरम घुरम हेइत रहइक आर मने करइस छुछा हांथे छुछाइ जिउ जातेइक ? एखरा फारसा माहान बाघेक सिकार करे पारता ? सेइ बेरांइ धिरेने अखराके कहलेइ तहरा इठिनेइ रहा। एहे सुनिके बिरेने धिरेन के कहलेइक – आर तंइ काहां एकलाइ जाबे, | घुरे चालेइ । माताल धिरेन के आरअ कने बुझाइ पारतेइक ? एकेइ टा कथा अकर मइअ आरअ नि घुरम। एकर एसन जिदलाहा कथा सुनि हामरानि भाभलिए एखराके एकाइ केसेके जाइ देबेइक । तेंइ अखराउ कहलाक जेइ हेउअक हामराउ संग देब । एखराक एसन कथा सुनि धिरेने आरअ किछु ना कहि खालि एतनाइ कहल बाघ करअ जिउ मर हांथे ।

सेइ डुंगरि माहान दुलसि ढुलसि ढेइर पाखना रहलेइक । हाड़ार हुडुर पाखना कर संगे संगे दुनिआ भरेक कांटा झंटा, लत-पात माहान हुलकअलेइ जा हेलाक एहे तिनअ झन । बिरेन आर सेइ तिसरा झन कर डरउ लागेहेलेइक । मेनतुक मुड़ भिंजाइके कनह खुरके डाराउताक बा केसे? हुड़ मुड़ जातरा जे करे बिधाताक पारा अखरा कांटा झांटा माहान चथाइलेइ जा हेलाक। सउब ले आगुंइ आगुंइ धिरेन रहल । धिरेन सेइ दुलसि दुलसि पाखना कर पास जेसेइ गेल ना अंइ संगा बाटे थिथाइके देखे लागल | माने अंइ बाघ टाके देखे पाउलेइक । उठिन बाघ चुपचाप आहाइ कनह दिगे घसका घसकि नाइ । मेनतुक एसन बे जुइते बाघ टा आहेइक जे हेंठे जाइ चटाइएक कनह जुइत निहिं बुझाइक । धिरेने बाघेक मुड़ि ना पाइके बिरेन निखाके आउएक इसारा करलेइक । अखरा उहां जाइके देखल ना बाघ टा चित पातान हेइके सुतल आहेइक । बुझाहेइक एबार गटा राइत भरेक थकान मेटाइ साजाइ ।

बाघटा मसतअ बड़अ चितकाबरा रहल। गाइ, गुरु, भेड़ि, छागइर खाइ खुन भुसड़ाहा हेइ रहल। एसन बाघ देखिके अखराक गड़ हांथ टुल टुल कांपे हेलेइक । उ बेरांइ सउभिक गाथेक रेउआ सिहरिके डाढ़ाइ गेल रहलेइक । सेइ खने धिरेने एतेक आंटे दांत चेबा हेलेइक जे गटा गाल टा कांपे हेलेइक । एसन इसथिति माहान बाघ टाके जाइके काटे बने हेलेइक आर ना छाड़ेउ। एहे बेरांइ जदि बाघ खिसिआइ जाइक ता हेले अखराक सउब खाटालि टा बेकार हेइ । जातेइक । आर काइल परसु आरअ काके कांदातेइक ?

सेइ खनेइ धिरेने एक टा बुइद फांडल आर कहल, पाखना टाके जदि अकर गाथेक उपर गिराइ पारिए, ता हेले बाघ जातातेइक, तखन नाभिके चटाबइक । एहे भाभि तिनअ झने मिलिमिसिके सेइ पाखना अकर उपर ठेलिके गिराइ देल । । एकर परे उहां नाभिके देखल ना बाघ टाक मुड़ टा गेंजरि गेल ! आहेइक । बाघेक मुड़ गेंजरा हेल देखिके अखरा तिनअ एक दसराक मुंह ताका ताकि हेइके हांसे लागल आर छाति टानि, घार घुरइतके कहे लागलाक – हं हामराउ हेकिए !

एहे डुल बाघ कर सिकार करि धिरेन कर हिआ जुड़ालेइक, भले अकर घारेक गाइ बाघेक दांराइ खाइ जाइएक । कारन गाइ चुमान निहिं हेतेइक मेनतुक सेइ बाघे आरअ काकरअ गाइ, बरदके निहिं खातेइक । एहे डुल सिकार केहनि माहान बिरता कर छाप आहेइक ।